Page:Ronsard - Œuvres complètes, Garnier, 1923, tome 1.djvu/139

Cette page n’a pas encore été corrigée

XLVIII

Ny de son chef le trésor crespelu,
Ny de son ris l’une et l’autre fossette,
Ny le reply de sa gorge grassette,
Ny son menton rondement fosselu,
Ny son bel œil que les miens ont voulu
Choisir pour prince à mon ame sugette,
Ny son beau sein, dont l’Archerot me gette
Le plus agu de son trait esmoulu,
Ny de son corps les milliers de charités,
Ny ses beautez en mille cœurs escrites,
N’ont asservy ma libre affection.
Seul son esprit, où tout le ciel abonde,
Seule sa douce et sa grave faconde
Me font mourir pour leur perfection.


MURET Ny de son chef.) Il dit qu’il n’a point esté asservi par les beautez corporelles de sa dame, ains seulement par le bon esprit, et par l’éloquence qui est en elle. Le trésor crespelu.) Le poil mignonnement frisé. L’une et l’autre fossette.) C’est une chose bien séante aux damoiselles, lors qu’elles mignardent leurs ris, de faire deux petites fosselettes aux deux costez de la bouche. Ovide homme bien entendu en telles affaires, le commande. [Ars amat. III, 283.] Sint modici rictus, parvaeque utrinque lacunae, Et summos dentés ima labella te gant. L’Archerot.) Amour. De charités.) De grâces.