Page:Ripa - Iconologie - 1643.pdf/437

Le texte de cette page a été corrigé et est conforme au fac-similé.


La Cygale qui ſe void poſée ſur la Lyre, ſignifie la Muſique, à cauſe de ce qui aduint à vn certain Eunomius, qui joüant vn iour de cét inſtrument à l’enuy du fameux Ariſtoxene, eut tant de bonne fortune, qu’au point le plus charmãt de ſa piece vne corde s’eſtant rompuë, vne Cygale ſe vint poſer ſur ſa Lyre, & ſupplea ſi bien par ſon chant au manquement de la corde, qu’il demeura victorieux : D’où il aduint que pour memoire de cette action, les Grecs dreſſerent vne ſtatuë au meſme Eunomius, tenant vne Lyre, où ſe voyoit vne Cygale ; ce qui fut pris pour vn vray Hyeroglife de la Muſique.

Le Roſſignol en eſt auſſi vn Symbole, pour ſa merueilleuſe melodie, où ſe treuue naturellement, comme les Anciens l’ont remarqué, tout ce qu’il y a de plus excellent & de plus parfait en ce bel Art.

Quant au Vaſe plein de vin, il ſignifie que la Muſique a eſté inuentée pour reſiouïr les Hommes, comme fait cette precieuſe liqueur, de laquelle ceux de cette profeſſion ne ſont pas amoureux ſans cauſe, puiſqu’au iugement des plus Anciens eſcriuains, les Muſiciens & les Poëtes ſe plaiſent fort en la compagnie du bon pere Bacchus.