Matthieu Ricci ayant exprimé le monde avec des noms Chinois, il le disposa de sorte, que le Royaume de la Chine se voyoit au milieu. Mais la plus part d’iceux maintenant recognoissent leur erreur, & s’en rient.
Celuy qui gouverne tout le Royaume avec puissance absoluë est appelle Seigneur de cet univers, pour ce qu’ils croyent que leur Royaume est quasi fermé de mesmes bornes que l’univers : car, à peine daignent-ils appeller Royaumes les Royaumes voisins, desquels ils en cognoissent peu devant qu’ilz traffiquassent avec les Européens. Si cela semble estrange à quel qu’un des nostres, qu’il sçache aussi que le mesme peut sembler aux Chinois, s’ils entendent que plusieurs de nos Monarques, qui n’ont jamais eu aucun droict sur le grand Empire des Chinois, sont ornez de mesmes tiltres. Cecy soit assez dict touchant le nom du Royaume. Quant à ce qui touche la Grandeur, ce n'est pas sans sujet que par l’opinion de tous ceux qui ont jamais escrit, l’Empire des Chinois a obtenu le nom de Grand. Car si vous considerez la situation, & limites des terres, il surpasse aujourd’huy, & a surpassé devant tous siecles (à ce que j’ay peu jusqu’à present comprendre) tous les Royaumes du monde, au moins nommez d’un seul nom. Car vers le midy il commence au dixneufiesme degré du Pole eslevé sur l’Horizon, en l'Isle qu’ils appellent Hainam, qui signifie mer du Midy, & il s’estend vers le Septentrion au quarante-deuxiesme, à ces murs Septentrionnaux, desquelz les Chinois divisent & defendent leur Empire de la Tartarie. En longueur il commence au cent douziesme, depuis les isles fortunées, en la Province qu’ilz appellent Yunan, & est borné de la mer vers l’Orient au cent trente deuxiesme. Nous avons tiré nous mesmes le plus exactement qu’il a esté possible ceste dimension de limites en divers lieux de ce mesme Royaume, par lesquelz nous avons passé, à la reigle des Astrolabes, & autres instruments desquelz les Mathématiciens se servent, avec observation des Ecclipses, et selon les Kalendriers Chinois, ausquelz les pleines & nouvelles Lunes sont de poinct en poinct descrites, & principalement de l’autorité des plans Cosmographiques. Et certes du Midy au Septentrion, où principalement les nostres jusqu’à present ont employé leur industrie, il semble n’y pouvoir rien estre adjousté. Mais en la longueur, si ceux qui viendront après nous, apres avoir par la volonté de Dieu introduict l’Evangile en ces parties, font quelque remarque plus particulière, qui sera (comme je croy) de peu de consequence, je cède volontiers à leur autorité, & croy qu’on doit faire plus d’estime des dernières observations, que des premieres.
Par ceci on void que ceste ample estendue en un seul Royaume est plus grande partie contenue entre le Ciel bening de la Zone temperée
