.
de la maniere qu’il a observée.
LEs commencemens des longs voyages & des choses difficiles, qui avec le cours du temps se sont eslevees, ont souvent esté entièrement incognus à la posterité. Recherchant plusieurs fois la cause dont cecy pouvoit proceder, à peine en ay je peu trouver une autre, sinon que les commencemens de toutes choses (& mesme de celles qui croissent en apres à une grandeur demesurée) sont si foibles & petis en leur source qu’ilz semblent ne promettre rien moins que la grandeur qui s’en doit ensuyvre. Pour cete cause, ceux qui tirent, comme on dit, ces choses du berceau de leur enfance, ne se peinent pas beaucoup de reduire en memoire, ce qui pour lors ne semble pas meriter qu’on s’en souvienne : si ce n’est d’aventure que nous aymions mieux avouër, que les premiers commencemens de semblables entreprises sont envelopez de tant & de si grandes difficultez, que les auteurs d’icelles estant entièrement occupez à l’action, sont non moins à faute de temps que de pouvoir, empeschez d’ecrire.
C’est pourquoy pour deduire l’entrée de nostre Compagnie aux frontieres
