Ali. C’eſt vne queſtion bien mal-aiſee à ſoudre :
toutefois quant aux Huguenots, ils ne pouuoyent
faire de moins pour iuſtifier leur cauſe, & recommander
deuant Dieu & les hommes leur parti
(qu’on accuſoit de ſedition) que de monſtrer vne
manſuetude & ſucceſsiue obeiſſance à leur Roy,
& à ſes miniſtres, ſelon Dieu.
Phila. Voire : mais on pratiquoit par trop ſouuẽt
ſur eux, la fable du loup d’AEſope, lequel beuuãt
au haut de la riuiere, chargeoit l’agneau (qui beuuoit
tout au bas) de luy troubler l’eau, comme il
diſoit que ſon pere auoit fait, prenãt ſur ceſte
querelle d’Alleman, occaſion de le deuorer.
Le pol. Laiſſons ce diſcours ie vous prie,
n’interrompons pas celuy de l’Hiſtoriographe.
L’hiſt. Ceſt Edict de paix fait & publié, il fut iuré
& promis par tous les officiers de la France, de
l’obſeruer : Les Huguenots de leur part renuoyerent
leur ſecours d’Allemagne, & ſe conformerẽt
en tout le ſurplus, à la volonté du Roy, declaree
en ſon Edict.
La Royne de Nauarre, le prince de Nauarre,
le prince de Condé, l’Admiral, le comte de la
Roche-foucaut, & quelques autres ſeigneurs & gentils-hommes
s’eſtans retirez à la Rochelle, apres
les ſermens & promeſſes de la conſeruer au Roy
faites comme il appartenoit, viuoyent le plus
paiſiblement qu’on pourroit penſer : & quelques
gentils-hõmes, gens de letres, & marchans, ſous meſmes
promeſſes s’eſtoyent pareillement retirez és
autres trois villes baillees pour refuge : & tous les
autres Huguenots retournez en leurs maiſons, ſe
