Apres Henry, le meſme feu cõtinua ſouz
François ſecond, qui luy ſucceda au Royaume, duquel
tout le gouuernement tomba auſsi toſt entre les
mains de meſsieurs de Lorraine, tant à cauſe de
leur niece royne d’Eſcoſſe, qui eſtoit mariée à
François, que pour leur habileté & ſouppleſſe.
Les Princes du ſang, voyãs l’eſtat du royaume
és mains du Cardinal de Lorraine, du Duc de
Guyſe, de ſes autres freres Lorrains, de leurs
partiſans & amis, n’apperceuans en François autre
choſe de reſte que le nom de Roy ſeulement, ſe
reſolurent de luy faire entendre l’eſtat de ſes
affaires, de le ſupplier treshumblement de
conuoquer au pluſtoſt les eſtats de ſon Royaume, de le
manier & conduire auec l’aduis des princes de
ſon ſang ou bien de les charger du maniement, &
s’en repoſer ſur eux, ſuyuant les ancienes loix de
Frãce, iuſqu’à ce que l’aage luy euſt apporté plus
grande cognoiſſance d’affaires. Quant à eux, ils ne
pouuoyent plus longuement ſouffrir, de voir le
Royaume conduit à l’appetit d’vn Cardinal,
(duquel la vocation eſtoit de preſcher) & de ſes
frères leſquels deuoyent en toutes ſortes ceder aux
Princes du ſang, & pluſtoſt rendre conte de leur
adminiſtration, que paſſer outre à la conduite de
l’eſtat : n’eſtans exempts de ſoupçon de ſe vouloir
emparer du Royaume : Ce que les Princes
craignoyent d’autant plus, que ceux de Lorraine ſe
diſoyent deſcendus de Charlemagne, fils de Pepin
roy de France, ſur la lignee duquel, apres la mort
de Loys le Quint 34. Roy de Frãce, en l’an 988.
ſelon que leurs hiſtoriens le recitent, Hugues Ca-
