ligue auec elle, que pour la deceuoir, & tromper,
& trahir ſous meſme manteau, les poures Huguenots
François : Que Dieu, qui luy a fait tant de faueur,
que de la tirer de la priſon, à la Couronne
d’Angleterre, luy demande preſentement, qu’elle
tire hors de la preſſe, les membres de ſon fils Ieſus,
& autres raiſons pregnantes, tirees non ſeulement
de l’Eſcriture, laquelle nous monſtre en mille
paſſages, que ie luy alleguois, la ſymmetrie, &
bõne intelligẽce, qui doit eſtre au corps de Chriſt
ains auſsi, des raiſons, tirees de la neceſsité, de l’eſtat,
& d’autres que le ſens commun ſimplement
nous dicte, nous enseignant de nous oppoſer à ces
vilains & execrables mõſtres, & de les retrencher
d’entre les hommes, comme ennemis iurez du gẽre
humain : Ainſi que Ciceron meſmes, le nous
enſeigne, en ſon liure des Offices, duquel ie luy alleguay
le paſſage, en langue Latine, que ſa maieſté
entend fort bien, qui dit, que nous ne pouuons ne
deuons nous aſſocier, ou auoir commerce auec
les tyrans, pluſtoſt nous en eſloigner, & diſtraire :
& que ce n’eſt pas contre nature, de deſpouiller, ſi
nous pouuons, celuy, que nous pouuons honeſtement
tuer : que tout ce genre peſtifere, & prophane,
doit eſtre exterminé de la communauté des
hommes, eſtant choſe treſraiſonnable, tout ainſi
comme nous voyons, qu’on retrenche les membres
eſtiomenez du reſte du corps, de ſeparer du
conſorce, & commune ſocieté des hommes, ces
beſtes cruelles, & farouches.
Apres(dis-ie) luy auoir remontré cela, & pluſieurs autres choſes, touchant la charité Chreſtie-
