choſe pleine de ialouſie que la ſouueraineté, qui
ne ſe communique iamais à autruy, de ſorte que
toutes les raiſons que la royne d’Eſcoſſe pourroit
alleguer en ceſt endroit font contre elle. Car ſi
pour eſtre ſouueraine elle pretẽd que nul ne peut
ny doit attenter ſur ſa perſonne, par ce que ce
ſeroit entreprendre ſur la perfonne & eſtat d’vn
ſouuerain. Pourquoy eſt-ce qu’elle a entreprins
& coniuré contre la perſonne de la royne d’Angleterre
& ſon eſtat meſmes en ſon Royaume ?
Et tout ce qu’elle peut dire pour extoller la ſouueraineté
& exemption des Rois fait contre elle.
Parce que c’eſt la premiere qui l’a violee, par ainſi
elle ne s’en peut plus ſeruir, non plus que celuy
qui enfreint vn priuilege, ne s’en peut plus aider,
meſmes enuers celuy enuers lequel il l’a rompu,
Celuy qui n’eſtoit reſpecté par le Conſul comme
Senateur, diſoit qu’il ne le reſpecteroit auſsi comme
Cõſul. Ie ne veux pas debatre ſi elle eſt pareille,
ou ſubalterne à l’Angleterre : ſi elle eſt encores
Royne ou priuee de ſon Royaume, cela eſt certaĩ
que les eſtats l’en ont peu deſmettre. Mais quãd
elle ſeroit plus aſſeuree royne ou monarque, quelle
n’eſt, puis qu’elle ne craint en la terre d’vn autre
Roy faire des entreprinſes pour luy oſter la
vie & la Couronne, ne peut il pas iuſtement dire ?
Pourquoy voulez vous que ie reſpecte la ſouueraineté
que vous auez hors d’icy, que vous ne reſpectez
pas la miene en ma terre propre ?
S’il n’eſtoit permis à vn Roy de cognoiſtre de
tels faits ſur les eſtrangers Rois, le meſchãt ſeroit
de meilleure condition que l’innocẽt. Il ſeroit loi-
