Angleterre : chacũ ſcait cõme elle y eſt venue à refuge apres la deſroute d’vne bataille, cõme elle y a eſté receue à refuge & ſeureté de ſa vie : à ceſte heure la faire mourir, on dira que c’eſt l’acte le plus indigne d’vn Prince qui ait eſté fait iamais à autre Prince. Les plus barbares Princes ont eu ceſte humanité de receuoir les rois deiectez de leurs thrones, & les maintenir en toute ſeureté, les traiter auec honneur & dignité : & ont penſé que c’eſtoit leur propre grandeur de ſecourir, ou pour le moins retirer les rois expoliez de leurs eſtats, ſoit par leurs ſuiets ou par autres Princes. Et n’y a eu iamais difference de religiõ, inimitié paſſee, ny autre occaſion qui ait empeſché ce reſpect deu à la maieſté des Rois & Princes ſouuerains, & à ceux qui leur appartienẽt. On lit de Chilperic 4. roy de Frãce, que les François chaſſerent de ſon royaume qu’il fut receu à refuge par le roy de Lorraine Loys. Alphõfe roy de Portugal chaſſé par ſõ frere Sancho roy de Caſtille fut receu par le roy de Grenade Tilleda, biẽ qu’il fut Sarrazin : & quoy qu’il luy fuſt predit, qu’il ruineroit ſa poſterité : il ſe tĩt en ſeureté, & le laiſſa aller apres la mort de ſon frere en ſon royaume. Ces rois Loys II. & Charles 8. receurẽt Zizim ou Gemes Turc deieté de l’Empire par Baiazet ſon frere, voire meſmes le pape Innocẽt le receut Il eſt vray qu’Alexãdre 6. ſõ ſucceſſeur luy fit en fin vn trait de Pape. Themiſtocles fut receu par le roy des Perſes, & quoy que ſa ſœur luy demãdaſt punitiõ, de ce qu’il luy auoit tué ſes enfans à Salamine, iamais ne voulut violer l’Azyle & refuge, qui eſt és maiſõs des Rois
pour tous les Princes affligez.
