plus grand & preallable pour ſolider vn bon iugement,
c’eſt d’eſtablir la puiſſance & authorité legitime
de celuy qui veut eſtre iuge.
Les ambaſſadeurs des Rois ſont par toutes les
plus agreſtes nations, par toutes eſpeces de religions,
inuiolables, & ceux qui les offenſent tenus
pour execrables & violateurs du droict des gens :
à plus forte raiſon ceux qui offenſent les Rois,
deſquels les ambaſſadeurs n’ont que la reputation.
Les Romains ont laiſſé vn exemple qui eſt en pluſieurs
points cõforme au fait de la royne d’Eſcoſſe.
C’eſt des ambaſſadeurs venus de la part des
Tarquins à Rome pour emporter leurs meubles
apres leur reiection. Ces ambaſſadeurs firent vne
conſpirariõ auec aucuns Romains pour remettre
les Tarquins & renuerſer la Republique, tuer
les Conſuls & principaux d’icelle : la conſpiratiõ
eſt deſcouuerte : les Romains ſont punis, iuſques
à la que Brutus fit mourir ſes propres enfãs. quãt
aux ambaſſadeurs, le fait eſt debatu au Senat, où
le droict de gens le gaigna, & furent les ambaſſadeurs
enuoyez en ſeureté. Celuy qu’ils repreſentoyẽt
qui eſtoit Tarquin eſtoit chaſſé de ſon Royaume,
comme la royne d’Eſcoſſe : les ambaſſadeurs
auoyent faict la conſpiration dans Rome,
apres y auoir eſté receus, comme la royne d’Eſcoſſe
a fait en Angleterre apres y auoir eſté receue.
Et toutefois il fut iugé qu’encore en ce cas ils eſtoyent
inuiolables.
La ſeconde qualité que la royne d’Eſcoſſe peut
alleguer pour eſtre exempte de la generale condãnation
des cõſpirateurs, eſt, qu’elle eſt refugiee en
