ſeulemẽt pour auoir attenté. Reſte donc pour vn
principe conſenty & indubitable par toutes les nations
de la terre, & par toutes loix diuines & humaines.
Que vne telle conſpiration eſt digne de
plus de morts & ſupplices que le coulpable ne
ſcauroit ſouffrir : & par conſequent ſenſuit que la
punition n’eſt pas moins iuſte & honeſte, qu’elle
eſt vtile & profitable.
L’hi. Ie t’accorde cela ſimplement : Mais auſsi il
faut que tu me confeſſes, par l’aduis de Ciceron
meſmes ,que ſi l’on propoſe deux honneſtes &
deux vtiles, quand & quand qu’il faut prendre le
plus vtile, le plus honneſte & mieux ſeant.
Le pol. Ie l’auouë.
L’hi. Il y a plus : C’eſt qu’en toutes choſes & ſurtout
en tous iugemens, on traite premier des perſonnes,
apres l’on traite de leur fait, ie dis notamment
des perſonnes du iuge & de l’accuſé.
Le pol. Ie le confeſſe, mais que s’enſuyura-il pour
tant ?
L’hi. C’eſt que ſi nous conſiderons les qualitez de
la perſonne de la royne d’Eſcoſſe, nous trouuerõs
pour la premiere, quelle eſt maiſtreſſe de ſõ Royaume,
de pareille puiſſance que la royne d’Angleterre
n’eſt ſubiecte, inferieure ny iuſticiable. Qui
es tu donc, dit l’Eſcriture, qui iuges le ſeruiteur
d’autruy : Dieu a, comme auec vn cordeau, departy
la terre entre les hommes, qui taſche de l’outrepaſſer, contreuient au dixième commandement
perpetuel & inuiolable. Et d’aller reſuſciter quelques
vieux droits de ſouueraineté, que l’Angleterre
pretend deſſus l’Eſcoſſe, & en vouloir vſer
