eſtre iuge. Et nous auons (comme tu ſcay) à
traiter d’vne autre matiere : toutefois pource que
ceſt affaire importe tant à l’Egliſe de Dieu, ſi tu
veux, afin que faute de raiſons, on ne laiſſe plus lõguement
vne punition ſi neceſſaire en arriere, ie
tiendray le parti de la royne d’Eſcoſſe (par forme
de deuis) & t’allegueray au mieux mal qu’il me
ſera poſsible, tout ce que ces partizans alleguent,
pour l’exempter de ſon dernier ſupplice, toy au
contraire debatras ce qu’il te ſemblera eftre raiſonnable,
ſelon l’eſtat & la conſcience pour le biẽ
de ce peuple-là. I’ay bon moyen d’en aduertir des
Myllords qui me ſont amis. Apres cecy, ie te feray
entendre le ſuccez de tout mon voyage.
Le pol. Ie le veux bien, & ſi ne fay point de doute
que ie n’en puiſſe bien reſoudre ceux qui ſans
paſsion auec vn iugemẽt pur & net, voudront meſurer
mes raiſons. Mais deuant que paſſer outre,
ie ſuis d’auis qu’en ce fait-cy (comme en toute autre
matiere d’eſtat) nous ayons deux conſiderations
conioinctement, L’vne, Si ce qu’on propoſe
eſt honeſte, l’autre, S’il eſt vtile. Ceux qui en matieres
d’eſtat, dient qu’il ne faut cõſiderer que l’vtilité,
monſtrent qu’ils n’ont guere l’honneur, &
encores moins la conſcience en recommandatiõ.
Le populace d’Athenes ſuffit pour leur faire hõte
au iugement qu’il donna, du conſeil que Themiſtocles
leur vouloit bailler ſãs le déclarer qu’à
vn. Ils eſleurent (comme tu ſcay) pour l’ouyr non
point le plus affectionné à l’amplification de leur
Republique, ains Ariſtides le plus iuſte, auquel
apres qu’il leur eut rapporté que le cõſeil de The-
