Le pol. Elle l’a eſchappé belle ceſte poure Rochelle :
Car ſi tu ne le ſcais, ie t’oſe dire pour certain,
que l’armee de mer de Stroſſy, & du Baron de la
garde, qui eſtoit en Brouage pres de la Rochelle
il y auoit plus de quatre mois, pour attendre (ce
diſoyent-ils en ſecret) la flotte d’Eſpagne, & la
cõbatre (comme auſsi l’Amiral le penſoit) & de là,
ſingler à Fleſsinghe, ne taſchoit qu’à ſurprendre
la Rochelle à poinct nõmé : & plus de deux mois
auant la tuerie de Paris, la Royne-mere auoit enuoyé
à Stroſſy vne letre eſcrite de ſa main propre,
bien cachetee, luy deffendant par vne autre letre
qu’il receut la premiere, de ne point ouurir ceſte
la, iuſques au 24. iour d’Aouſt : Or les mots
de la letre que Stroſſy ouurit le 24. d’Aouſt, eſtoyent,
S T R O S S Y, ie vous auertis que ce iourdhuy
24. d’Aouſt, l’Amiral, & tous les Huguenots qui
eſtoyent icy auec luy, ont eſté tuez. Partant auiſez
diligemment à vous rendre maiſtre de la Rochelle :
& faites aux Huguenots qui vous tomberont
entre les mains, le meſme que nous auons fait à
ceux-cy. Gardez vous bien d’y faire faute, d’autant
que craignez de deſplaire au Roy, Monſieur
mon fils, & à moy. Et au deſſous,
C A T H E R I N E.
Ie te laiſſe à penſer, ſi Dieu les a bien gardez.
L’hift. I’auoy’ bien touſiours creu, que l’armee de
Stroſſy n’eſtoit pas pres de la Rochelle pour neant :
& que les ſoldats qui eſtoyent à l’entour par
mer & par terre, mangeans, forçans, & pillans le
bonhomme, ne taſchoyent qu’à ſe rendre plus
