Roy a pouuoir, qui ne veut aller à la meſſe, faut
qu’il meure, ou qu’il fuye ſecretement hors du
Royaume : Et croit-on que depuis le 24. d’Aouſt
iuſques à maintenant, il y a eu plus de cent mille
perſonnes Huguenotes tuees par toute la France,
ſous pretexte de leur conſpiration : Encores
ne ſont-ils pas ſaoulez, leur cholere n’eſt point
aſſouuie.
L’egl. O Dieu tout-puiſſant, ô paſteur d’Iſrael, iuſques
à quand fumeras-tu contre l’oraiſon de ton
peuple ? Tu l’as repeu de pain de larmes, & l’as
abbreuué de pleurs. Tu nous as mis en querelles
contre nos plus proches, & en moqueries parmi
les nations. Tu as tranſporté ta vigne d’Egypte,
tu l’as plantee, & luy as preparé le lieu, afin qu’elle
y prinſt racines & s’eſtendiſt, en rempliſſant la
terre : Pourquoy dõc as tu rompu ſa haye, la baillant
en proye aux paſſans ? pourquoy a-elle eſté
conſumee par le ſanglier, & deuoree par les beſtes
ſauuage ? Les gens ſont entrez en ton heritage,
ils ont baillé les corps de tes ſeruiteurs en viande
aux corbeaux & la chair des bien viuans aux
beſtes de la terre. Ils ont eſpars le ſang des tiens,
& n’y auoit aucun qui les enſeueliſt. Iuſques à
quand Seigneur, te courrouceras-tu ? ton ire ſera-elle
pour iamais embraſee ? Reſpan Seigneur tes
indignations, ſur les gens qui ne te cognoiſſent
point, & ſur les royaumes qui n’inuoquent point
ton Nom : car ils ont preſque eſteinte toute la
poſterité de Iacob, & ruiné ſa demeure. Que la vengeance
du ſang de ceux qui te reclamoyent eſpandu
contre tout droict, ſoit cognue par toute la
