Le pillage des ſeigneurs, gentilshommes, marchands,
& autres Huguenots tuez, eſtoit fait par
authorité priuee, ou donné & departi par le Roy
à ſes courtiſans, & autres ſiens bons ſeruiteurs :
deſquels les aucuns trouuãs quelque choſe de ſingulier
parmi la deſpouille des morts, le venoyent
offrir & preſenter au Roy, à ſa mere, ou à quelque autre des Princes à qui ils eſtoyent plus affectionnez.
En ces entrefaites le Roy aſſembla ſon conſeil,
auquel furent monſtrees par Monſieur frere
du Roy, certaines letres du mareſchal de Montmorency,
à Teligny, du vendredi 22. d’Aouſt apres
la bleſſure de l'Amiral, en reſponſe de celles
que Teligny luy en auoit eſcrit : & furent leſdictes
letres trouuees dãs les coffres & entre les papiers
de Teligny mort : Par icelles, le mareſchal de
Montmorency monſtroit ouuertement, le deſplaiſir
qu’il auoit receu, entendant la bleſſure de
l’Amiral ſon couſin : Qu’il ne vouloit pas en
pourſuyure moins la vengeance, que ſi l’outrage euſt
eſté fait à ſa propre perſonne, n’eſtant pas pour
laiſſer en arriere, choſe qui peuſt ſeruir à ceſt effect, ſachant combien vn tel acte eſtoit deſplaiſãt au Roy.
Or auoit il eſté conclu au ſecret conſeil
d’entre le Roy, la Royne-mere, Mõſieur frere du Roy
le duc d’Aumale, le duc de Neuers, le comte de
Rets, Lanſac, Tauanes, Moruilliers, Limoges, &
Villeroy (tenu quelques iours auant la tuerie)
qu’auſsi toſt que l’Amiral & les Huguenots ſeroyent depeſchez dans Paris, le duc de Guyſe, & ceux
