Ce iour-la de ſamedi, le Roy enuoya viſiter
l’Amiral par diuers gentils hommes. La nouuelle
eſpouſee l’alla auſsi viſiter.
Ce meſme ſamedi, dãs le cõſeil priué du Roy,
furent examinez certains teſmoins, touchant l’arquebouzade,
le tireur, & les coulpables : tellemẽt
que l’Amiral & ſes amis, croyans que la voye à
iuſtice leur fuſt ouuerte, ſe reſiouiſſoyent grandement,
s’aſſeurans de pouuoir facilement conuaincre
les autheurs du faict : dequoy ils aduertirent
leurs amis en pluſieurs endroits du Royaume, par
des letres qu’ils leur eſcriuirent, les prians de ne
bouger, & ne ſe faſcher de ce qui eſtoit aduenu à
l’Amiral. Que Dieu & le Roy eſtoyent puiſſans
d’en faire la vengeance : que deſia on commençoit
à proceder contre le coulpable & ſes fauteurs
par iuſtice, & les bleſſures n’eſtoyent pas,
Dieu merci à mort : que combien que le bras fuſt
bleſſé, le cerueau ne l’eſtoit pas. En ceſte façon
les conſolant par letres, les auertiſſoyent de ſe tenir
coys, en attendant l’iſſue telle qu’il plairoit à
Dieu d’enuoyer.
Ce iour-la Monſieur frere du Roy, & le cheualier
d’Angouleſme ſe pourmenoyent dans vn coche
par la ville de Paris, enuiron les quatre heures
apres midy. Dés ceſte heure-là il courut vn
bruit par Paris, que le Roy auoit mandé le mareſchal
de Mont-morency, pour le faire venir à Paris,
auec grand nombre de caualerie & d’infanterie :
que partant les Pariſiens auoyent occaſion
de ſe prendre garde : mais ce bruit-là eſtoit
faux.
