Page:Raoul - Trois satiriques latins, vol 1 Juvénal, 1842.djvu/124

Quid, quod et antiquis uxor de moribus illi
Quaeritur ? O medici ! mediam pertundite venam.
Delicias hominis ! Tarpeium limen adora
Pronus, et auratam Junoni caede juvencam,
Si tibi contigerit capitis matrona pudici.
Paucae adeo Cereris vittas contingere dignae, ⁵
Quarum non timeat pater oscula. Necte coronam
Postibus, et densos per limina tende corymbos. ⁶
Unus Iberinae vir sufficit ! Ocius illud
Extorquebis, ut haec oculo contenta sit uno.
Magna tamen fama est cujusdam rure paterno
Viventis. Vivat Gabiis ut vixit in agro ;
Vivat Fidenis, et agello cedo paterno.
Quis tamen affirmat nil actum in montibus, aut in
Speluncis ? Adeo senuerunt Jupiter et Mars ? ⁷

Porticibusne tibi monstratur femina voto
Digna tuo ? cuneis an habent spectacula totis
Quodsecurus ames, quodque inde excerpere possis ?
Cheironomon Ledam molli saltante Bathyllo,
Tuccia vesicae non imperat ; Appula gannit