de mettre eux & la forteresse à feu & à sang. Ceux du chasteau feirent response, quilz vouloient la Nymphe pour soy, & que s’ilz la vouloient recouurir, il failloit iouer des cousteaux, & n’oublier rien en la boutique. A tant non seulement ne la rendirent à ceste sommation, mais la monterent au plus haut de la tour quarree en veue de la part foraine. Le heraut retourné & entendu le refus, son Excellence tint sommairement conseil auecques ses Capitaines. Là fut resolu de ruiner le chasteau, & tous ceux qui seroient dedens.
Auquel instant, par le costé droit du bas de la place entrerent au son de quatre trompettes, fifres & tabours vn estanterol de gens de cheual, & vne enseigne de gens de pied, marchans furieusement, comme voulans entrer par force dedens le chasteau au secours de ceux qui le tenoient. Des gens de pied estoit Capitaine le seigneur Chappin Vrfin, tous hommes galans, & superbement armez tant picquiers que harquebousiers en nombre de trois cens & plus. Les couleurs de son enseigne, & escharpes estoient blanc & orangé. Les gens de cheual faisans nombre de cinquante cheuaux & plus, tous en harnois dorez, richement vestuz, & enharnachez estoient conduits par les seigneurs Robert Strossi, & Maligni. La liuree du seigneur Robert de son accoustrement sus armes, des bardes, capparassons, pennaches, panonceaux, & des cheualiers par luy conduits, des trompettes pages & estaffiers estoit des couleurs blanc, bleu, & orangé. Celle du seigneur de Maligni, & des gens par luy conduits, estoit des couleurs blanc, rouge, & noir. Et si ceux de son Excellence estoient bien & aduantagement montez, & richement accoustrez, ceux cy ne leurs cedoient en rien. Les noms des
