tenoit vne dardelle argentee. Les autres Nymphes peu differoient en accoustremens : exceptez qu’elles n’auoient le croissant d’argent sus le front. Chacune tenoit vn arc Turquois bien beau en main, & la trousse comme la premiere. Aucunes sus leurs rochetz portoient peaux d’Africanes, autres de Loups ceruiers, autres de Martes Calabroises. Aucunes menoient des leuriers en lesse, autres sonnoient de leurs trombes. C’estoit belle chose les voir. Ainsi soy pourmenans par la place en plaisans gestes comme si elles allassent à la chasse, aduint qu’vne du trouppeau soy amusant à l’escart de la compagnie pour nouer vn cordon de sa botine, fut prinse par aucuns soudars sortiz du chasteau à l’improuille. A ceste prinse fut horrible effroy en la compagnie. Diane hautement cryoit, qu’on la rendist, les autres Nymphes pareillement en cris piteux & lamentables. Rien ne leur fut respondu par ceux qui estoient dedens le chasteau. Adonques tirans quelque nombre de flesches par dessus le parapete, & fierement menassans ceux du dedens, s’en retournerent portans face & gestes au retour autant tristes & piteuses, comme auoient eu ioyeuses & gayes à l’aller.
Sus la fin de la place rencontrans son Excellence, & sa compagnie, feirent ensemble cris effroyables. Diane luy ayant exposé la desconuenue, comme à son mignon & favorit, tesmoing la deuise des croissans d’argent espars par les accoustremens, requist ayde secours & vengeance. Ce que luy fut promis & asseuré. Puis sortirent les Nymphes hors la place. Adonques son Excellence enuoye vn heraut par deuers ceux qui estoient dedens le chasteau, requerant la Nymphe rauie luy estre rendue sus linstant. Et en cas de refus ou delay les menassant fort & ferme
I
