ché d’or, couuert de croissans estoffez en riche broderie de toille & canetille d’argent. De telle parure estoient semblablement vestuz & couuers tous les hommes d’armes susdits, & leurs cheuaux pareillement. Et n’est à obmettre qu’entre les susdits croissans d’argent à haut relief, par certains quadres estoient en riche broderie posees quatre gerbes recamees à couleur verde, autour desquelles estoit escrit ce mot, flavescent. Voulant signifier (selon mon opinion) quelque sienne grande esperance estre prochaine de maturité & iouissance.
Ces deux bandes ainsi escartees, & restant la place vuyde, soudain entra par le costé droit du bas de la place vne compagnie de ieunes & belles Dames richement atournees, & vestues à la Nymphale, ainsi que voyons les Nymphes par les monumens antiques. Desquelles la principale plus eminente & haute de toutes autres, representant Diane, portoit sus le sommet du front vn croissant d’argent : la cheuelure blonde esparse sus les espaules, tressee sus la teste auecques vne girlande de laurier toute instrophiee de roses, violettes, & autres belles fleurs : vestue sus la sottane & verdugalle de damas rouge cramoisi à riches broderies, d’vne fine toille de Cypre toute battue d’or : curieusement pliee, comme si fust vn rochet de Cardinal, descendant iusques à my iambe, & par dessus vne peau de Leopard bien rare & precieuse attachée à gros boutons d’or sus l’espaule gauche. Ses botines dorees, entaillees, & nouees à la Nymphale auecques cordons de toille d’argent : son cor d’Iuoire pendant souz le bras gausche, sa trousse precieusement recamee & labouree de Perles pendoit de l’espaule droite à gros cordons & houppes de soye blanche & incarnate. Elle en main droite
