Page:Rabelais marty-laveaux 02.djvu/53

Comment la braguette est premiere piece de harnois^[1]
entre gens de guerre.

Chapitre VIII.

Vovlez vous, dist Pantagruel, maintenir que la braguette est piece premiere de harnois militaire ? C’est doctrine moult paradoxe & nouuelle. Car nous disons que par esprons on commence soy armer. Ie le maintiens, respondit Panurge : & non à tord ie le maintiens. Voyez comment nature^[2] voulant les plantes, arbres, arbrisseaulx, herbes, & Zoophytes vne fois par elles creez, perpetuer & durer en toute succession de temps, sans iamais deperir les especes, encores que les indiuidus perissent, curieusement arma leurs germes & semences, es quelles consiste icelle perpetuité, & les a muniz & couvers par admirable industrie de gousses, vagines, testz, noyaulx, calicules, coques, espiz, pappes, escorces, echines poignans : qui leur font comme belles & fortes braguettes naturelles. L’exemple y est manifeste en Poix, Febues, Faseolz, Noix, Alberges, Cotton, Colocynthes, Bleds, Pauot, Citrons, Chastaignes : toutes plantes generalement. Es quelles voyons apertement le germe & la semence

1. Voyez ci-dessus, p. 61, la note sur la l. 17 de la p. 4. Le Houx est du même avis que Rabelais :

   C’est vn chaffeur sans sa trompe,
   Sans braguette vn lansquenet.

   (Vaux de vire, 1^er recueil, lxxiv, p. 89)

2. Ce qui suit est imité de l’Histoire naturelle de Pline (liv. vii).