Page:Rabelais - Pantagruel, ca 1530.djvu/132

Le texte de cette page a été corrigé et est conforme au fac-similé.

nous ne povons pas estre tous riches. Ie gaigne ainsi ma vie : et les porte vendre au marché en la cité qui est icy derriere. Iesus (dys ie) il y a icy ung nouveau monde. Certes (dist il) il n’est mie nouveau : mais l’on dit bien que hors d’icy il y a une terre neufve où ilz ont et soleil et lune et tout plain de belles besoingnes, mais cestuy cy est plus ancien. Voire mais (dis ie) mon amy, comment a nom ceste ville où tu portes tes choulx. Elle a (dist il) nom Alpharage, et sont Chrestiens gens de bien, et vous feront grang chiere. Brief ie me deliberay d’y aller. Or en mon chemin ie trouvay ung compaignon, qui tendoit aux pigeons. Auquel ie demanday. Mon amy dont vous viennent ces pigeons icy ? Sire (dist il) ilz viennent de l’aultre monde. Lors ie pensay que quand Pantagruel baisloit, les pigeons à pleines vollées entroient dedans sa gorge, pensant que feust ung columbier. Puis m’en entray à la ville, laquelle ie trouvay belle, bien forte, et en bel air, mais à l’entrée les portiers me demanderent mon bulletin, de quoy ie fuz fort esbahy, et leur demanday, messieurs y a il icy dangier de peste ? Ô seigneur (dirent ilz) l’on se meurt icy aupres tant que le chariot court par les rues. Iesus (dys ie) et où ? À quoy me dirent, que c’estoit en Laryngues et Pharyngues, qui sont deux grosses villes telles comme sont Rouen et Nantes riches et bien marchandes. Et la cause de la peste a esté pour une puante et infecte exhalation qui est sortie des abysmes despuis na guieres, dont ilz sont mors plus xxi. cens mille personnes, despuis huyct iours. Lors ie pense et calcule, et trouve que c’estoit une puante alaine qui estoit venue de l’estomach de Pantagruel alors qu’il mangea tant d’aillade, comme nous avons dit dessus. De là partant passay