quartaines villain, la blanchée n’en vault qu’ung pinart, et tu nous faiz icy les vivres : et adoncques pissa dedans son bacq, comme font les moustardiers à Paris. Or, dist Pantagruel, reserve nous ces beaulx comptes à une aultre foys. Seulement dys nous comment y sont traictez les usuriers : Adoncq dist Epistemon, Ie les veiz tous occupez à chercher les espingles rouillées et vieulx clous, parmy les ruisseaux des rues, comme vous voyez que font les coquins en ce monde. Mais le quintal de ses quinquailleries ne vault qu’ung boussin de pain, encores y en a il maulvaise depesche : par ainsi les pouvres malautruz sont aulcunesfoys plus de troys sepmaines sans manger morceau ny miette : et à travailler iour et nuict attendant la foire à venir : mais de ce travail et de malheureté y ne leur souvient point tant ilz sont mauldictz et inhumains, pourveu qu’au bout de l’an ilz gaingnent quelque meschant denier. Or, dist Pantagruel, faisons ung transon de bonne chere, et beuvons ie vous en prie enfans : car il fait beau boire. Lors degainnerent flaccons à tas, et des munitions du camp feirent grand chere. Mais le pouvre roy Anarche ne se povoit esiouyr. Dont dist Panurge, et de quel mestier ferons nous monsieur du Roy icy ? affin que il soit ià tout expert à l’art quand il sera de par delà à tous les diables. Vrayment, dist Pantagruel, c’est bien advisé à toy, or fays en à ton plaisir : ie te le donne. Grant mercy, dist Panurge, le present n’est pas de refus et l’ayme de vous.
Page:Rabelais - Pantagruel, ca 1530.djvu/127
Le texte de cette page a été corrigé et est conforme au fac-similé.
