Lors y perdit rables et cropions
Maistre levrault, quand chascun si efforce :
Sel et vinaigre, ainsi que Scorpions
Le poursuyvoient, dont en eurent l’escorce.
Car l’inventoire
D’ung defensoire
En la chaleur,
Ce n’est qu’à boire
Droit et net, boire
Et du meilleur :
Mais manger levrault, c’est malheur
Sans de vinaigre avoir memoire :
Vinaigre est son ame et valeur,
Retenez le en point peremptoire.
Lors dist Panstagruel. Allons enfans, c’est trop musé icy à la viande : car à grand peine voit on arriver, que grans bancqueteurs facent beaux faictz d’armes. Il n’est umbre que d’estandart, il n’est fumée que de chevaulx, et n’est clycquetis que de harnoys. A quoy respondit Panurge. Il n’est umbre que de cuysine. Il n’est fumée que de tetins, et n’est clycquetis que de couillons. Puis se levant fist ung pet, ung sault, et ung sublet, et crya à haulte voix ioyeusement : vive tousiours Pantagruel. Ce que voyant Pantagruel en voulut autant faire, mais du pet qu’il fist, il engendra plus de cinquante mille petitz hommes nains et contrefaictz : et d’une vesne engendra autant de petties femmes acropies comme vous en voyez en plusieurs lieux, qui iamais ne croissent, sinon comme les quehues de vache, contre bas, ou bien comme
