O-z o chèp’ co bé-n ah’, dô q’o son è l’onaye.
Mâ dô lè nôge è fâ mou mâ
Rollè, quéq’ peu chôgi, po drohô lè montaye.
E fau pourtant, piâ ou non piâ.
O ! cét je son pi d’mille et nonante et cin mâte ;
Ç’o euyt’ cen septante et dou tô.
Po lo villége è nî trô cen quarant’ quoéte âte ;
Ç’o dou cen cinquante heuy’ chéseau.
Nos on trô bôle mô et co trobé dè chaume
Q’ètiro trobé dè quiriou.
El y v’no pou couéri dès erbe q’son dè baume,
Et dô q’ è ’n on, è son èvrou.
Lè gran, dô q’è fâ chau, aimo d’boure è lè guiesse ;
El on do mau po lè vodiè.
Et no, évô pohi, dô lè pi gran soh’resse,
J’ ’n on in grô n’vô dô in potyè.
Je n’son cét’ mi bé lan de quoét’ mil sè cen tête ;
Et nos on, po viquè terti,
Lè vèhelle, lè pouhe, et lè tôle, et neu bête :
Lè terre o bé lan d’no néri.
Et dô qu’ è n’ î pi d’noge, o sohelle, o brossie ;
Ç’o èdon q’ lo mou d’mâ ervé.
Je son trobé quoy’tou po lo prè, lè fouyie,
Et po-z euvrè lo beu d’èoué.
