Mais ce qui travailloit encore autant et davantage le Roy et son conseil, estoient les Anglois saisis du Havre-de-Grace, qui se preparoient d’amener une plus forte armée en France, pour y prendre pied à la ruine et entière desolation du royaume, comme leur dessein a toujours esté sur diverses prétentions, depuis qu’ils en ont esté chassez. G’estoit au moins leur esperance, en nourrissant nos divisions, de s’emparer de la Normandie, comme ils avoient fait pendant les querelles des maisons d’Orleans et de Bourgogne. Tant y a qu’il n’y avoit personne au conseil du Roy qui ne fust d’opinion que l’on fist la paix.
Long-temps auparavant le cardinal de Lorraine estoit allé au concile de Trente, lequel fut si fasché de la mort du duc de Guise et du grand-prieur, ses frères, qu’il ne se travailloit d’autre chose ; et beaucoup de catholiques, qui avoient tant souffert en si peu de temps, ne demandoient pas moins la paix que les huguenots, les uns et autres fort lassez de la guerre.
Pour ces causes, après toutes choses bien pesées et debatues de part et d’autre, la Reyne, le prince de Condé, le Connestable, d’Andelot, et ceux qui, des deux parts, furent appeliez à ce traité, résolurent la paix, après avoir adverty l’Admiral des conditions d’icelle, qui estoient telles : « C’est à sçavoir que tous gentilshommes protestans ayans haute justice ou fiefs de haubert, pourroient faire exercice de leur religion en leurs maisons avec leurs sujets ;
« Qu’en tous les bailliages et seneschaussées, il y auroit une ville assignée aux huguenots pour l’exercice de leur religion, outre les villes esquelles l’exercice se faisoit auparavant le septiesme jour de mars, qui fut le
