toire et la place de bataille leur estoit demeurée, et s’estoient maintenus jusques à l’heure, pour attendre ce qu’il plairoit au Roy de leur commander.
Et après avoir dit, il présenta à Sa Majesté une infinité de ceux qui l'avoient accompagné audit Rambouillet, où le Roy, l’ayant remercié du bon service qu’il luy avoit fait ce jour-là, luy commanda et pria d’accepter la charge de l’armée pendant l’absence du Connestable ; et ainsi il fut fait lieutenant du Roy, avec grand honneur qui luy fut rendu, tant des gens de guerre que de ceux de la Cour, bien qu’il se voulust excuser de cette charge en suppliant le Roy d’y commettre quelque prince de son sang, ou le mareschal de Brissac.
L’Admiral cependant, qui avoit pris le chemin de la Beausse, alla à Dangeau, où il fut aussi esleu chef de l’armée des huguenots en l’absence du prince de Condé ; et là fit délibération d’aller rafraischir son armée es villes des pays de Sologne et de Berry, et prit une petite ville appellée Le Puiset, qui se rendit par composition. Estant à Espies en Beausse, il eut quelques advertissemens que le duc de Guise le vouloit suivre. Qui fut cause qu’il manda à Orléans pour rassembler tout ce qui s’y estoit allé rafraischir, puis s’en alla à Beaugency, où il passa la rivière de Loire, et alla, au commencement de janvier, à Selles en Berry, qu’il assiégea et prit par composition. Il alla semblablement prendre Sainct-Agnan et Montrichard, qui sont toutes places lesquelles ne pouvoient tenir, n’y ayant que les habitans. Le duc de Guise, d’autre part, ayant grande quantité d’artillerie, et son armée estant composée de gens de pied du reste de la bataille, ne pouvoit aller
