pooient venir ensemble, ne encor porroient il grever lor anemis. Et en pristrent un parlement que il seroient à l’insue del mois d’octobre à tot lor pooir en la praerie de la cité d’Andrenople, pour hostoier sor le roi de Blaquie. Et ensi departirent mult lié et mult haitié. Li marchis s’en alla à Messinople et l’emperéres Henris vers Constantinople.
256. Quant li marchis fu à Messinople, ne tarda mie plus de cinq jorz que il fist une chevauchie, par le conseil as Greu de la terre, en la montaigne de Messinople, plus d’une grant jornée loing ; et com il ot esté en la terre, et vint al partir, li Bougres de la terre se furent asemblés, et virent que li marchis furent à pou de gent, et vienent de totes parz, si s’assemblérent as l’arriére-garde. Et quant li marchis oï li cri, si sailli en un cheval toz desarmez, un glaive en sa main. Et com il vint là où il estoient assemblé às l’arriére garde, si lor corrut sus, et les chaça une grant piece arriére. La fû feruz le marchis Boniface de Monferrat parmi le gros del braz desoz l’espaules mortelement, si que il comença à espandre del sanc. Et quant sa gent virent ce, si se comenciérent à esmaier ez à desconforter, et à mavaisement maintenir. Et cil qui furent entor le marchis le sostindrent, et i perdi mult del sanc, si se comença à spasmeir. Et quant ses genz virent que il n’auroient nulle aie de lui, si se comenciérent à esmaier, et le començent à
