s’enfuirent par terre : ce qu’ils ne devoient toutefois faire, la ville estant bien fortifiée et fermée de si bonnes murailles qu’aucun n’eût osé entreprendre de les y attaquer, ny le Bulgare tourner de ce costé là. Mais quand il eut appris qu’ils s’en estoient fuis, quoy qu’il fût encores à douze journées de là, il y fit marcher son armée.
218. Les Grecs qui estoient restez dans la place luy ayans ouvert les portes, et s’estans rendus, il les fit tous prendre, grands et petits, à la réserve de ceux qui évadérent, et les fit conduire en Valachie, puis fit abatre les murailles et razer la ville : ce qui fut un grand dommage, cette place estant l’une des meilleures et des mieux situées de tout l’Empire. Il passa en suitte à Panium[1], qui se rendit pareillement, et dont les habitans furent traitez comme ceux d’Apre, et transportez en Valachie. De là il vint à Heraclée, qui est une ville assise sur un bon port de mer, et appartenoit aux Venitiens qui l’avoient tres-bien munie. Il la fit attaquer, et l’emporta d’assaut, auquel la pluspart de ceux de dedans furent tuez, et le reste mené comme les autres en Valachie, et la ville ruinée. Il traita de mesme ceux de la ville de Daonium[2], qui estoit tres-forte et belle, les habitans n’ayans ozé se deffendre.
219. Puis il fit marcher son armée vers Tzurulum, qui s’estoit cy devant renduë à luy, et l’ayant fait razer, il en fit mener les hommes et les femmes prisonniers, ne tenant aucune capitulation. Les Comains
