manda en outre à Machaire de Saincte Menehoud, à Mathieu de Valincourt, et à Robert de Ronçoy, qui estoit à Nicomedie avec environ cent chevaliers, de la quitter et se rendre au plustost devers luy.
181. D’autre part Geoffroy de Ville-Hardoüin, mareschal de Romanie et de Champagne, et Manassés de Lisle, partirent de Constantinople, du commandement de l’empereur Baudoüin, avec ce qu’ils pûrent recouvrer de gens, lesquels se trouvérent en petit nombre, dautant que tout le pays s’en alloit perdant. Ils donnérent jusques à Tzurulum qui estoit à trois journées de Constantinople, où ils trouvérent Guillaume de Braiecuel et ceux qui estoient avec luy, tous effrayez, qui furent rassûrez par leur arrivée. Ils sejournérent là quatre jours, pendant lesquels l’Empereur envoya au mareschal de Ville-Hardoüin tout ce qu’il pût ramasser de gens ; de sorte que dedans le quatriéme ensuivant, ils se trouvérent à Tzurulum avec quatre-vingt chevaliers. Lors le mareschal et Manassés de Lisle et leurs trouppes se mirent aux champs et vinrent jusques à la ville d’Arcadiople, où ils logérent et sejournérent un jour : de là ils passérent à une autre ville nommée Bulgarofle[1], que les Grecs avoient depuis peu abandonnée. Ils y demeurérent une nuit, et le lendemain arrivérent à Neguise[2], belle et forte place, et tres-bien garnie de toutes choses, distante d’Andrinople de neuf lieuës françoises, et trouvérent que les habitans l’avoient pareillement quittée, s’estans retirez à Andrinople, où estoient la pluspart des
