Page:Petitot - Collection complète des mémoires relatifs à l’histoire de France, 1re série, tome 1.djvu/358

Le texte de cette page a été corrigé et est conforme au fac-similé.
340
[1204] de la conqueste

roy de Bulgarie, et complotté avec luy de les trahir et mettre à mort, executérent leur perfidie en ce chasteau, et en tuérent la plus grande part, peu en estans eschappez, qui s’enfuirent à Andrinople, que les Venitiens tenoient lors. Peu de temps aprés les Grecs d’Andrinople mesme se revoltérent ; et ceux des nostres qui estoient dedans pour la garder furent contraints de l’abandonner, et d’en sortir avec grand danger. Les nouvelles en vinrent aussi-tost à l’empereur Baudoüin, qui estoit à Constantinople avec le comte de Blois et peu de gens.

179. Cét accident les troubla fort et mit en grand émoy : joint d’ailleurs que de jour à autre leur venoient nouveaux avis de la rebellion des Grecs, et que par tout où ils trouvoient des François en possession des terres et places de nouvelle conquéte, ils les mettoient à mort. Ceux qui avoient quitté Andrinople, Venitiens et autres qui estoient avec eux, vinrent à Tzurulum, qui estoit une ville des appartenances de l’empereur Baudoüin, où ils trouvérent Guillaume de Blanuel qui y avoit esté par luy estably gouverneur ; et sous la faveur de l’escorte qu’il leur donna, y allant mesme en personne avec le plus de gens qu’il pût, rebroussérent chemin en arriére à douze lieuës loin de là, et arrivérent à une ville, nommée Arcadiople[1], et qui estoit aux Venitiens, qu’ils trouvérent vuide, et la fortifiérent. Le troisiéme jour ensuivant, les Grecs du pays s’estans assemblez et mis en armes, y vinrent donner un rude assaut, que

  1. Arcadiople, autrefois Bergalium, fut rebâtie par Théodose, et ainsi appelée du nom de son fils Arcadius.