pour aller trouver le marquis et l’amener : l’un fut Gervais de Castel, l’autre Renier de Trit, et le troisiesme Geoffroy mareschal de Champagne : le duc de Venise y envoya aussi de sa part deux des siens. Les deputez partirent à l’instant, et arrivérent à Didymotique, où ils trouvérent le marquis et l’Imperatrice sa femme, accompagnez d’un grand nombre de braves hommes, et luy firent entendre comme ils estoient envoyez vers luy pour le prier de vouloir venir à Constantinople ; et particuliérement le mareschal de Champagne, auquel il avoit donné sa parole d’y venir, le pria de la vouloir executer, et de tenir le traité d’accord et de paix qui seroit arresté par ceux sur qui ils s’en estoient remis, s’offrans de le conduire en toute seureté, ensemble ceux qu’il voudroit mener avec luy.
158. Le marquis prit conseil là dessus des siens, aucuns estans de sentiment qu’il y allast, d’autres estans d’avis contraire. Mais à la fin il prit resolution d’y aller, et mena avec luy environ cent chevaliers. Estant arrivé à Constantinople, il y fut fort bien veu, tant du duc de Venise et du comte de Blois, que de nombre de personnes de condition desquels il estoit aimé, et qui luy allérent à la rencontre. Alors le conseil fut assemblé, où les conventions d’entre l’Empereur et le marquis furent renouvelées, et Thessalonique renduë au marquis avec ses appartenances et dependances, à la charge qu’il mettroit la ville de Didymotique, de laquelle il s’estoit emparé, és mains de Geoffroy mareschal de Champagne, qui s’obligea par serment de la garder sans s’en dessaisir, jusques à ce qu’il eust de luy messagers exprés avec bon pou-
