tours qu’ils avoient conquises et puis abandonnées.
92. Incontinent aprés, l’empereur Alexis sortit de Constantinople avec toutes ses forces par les autres portes, éloignées environ d’une lieuë du camp des François, et en si grand nombre qu’il sembloit que tout le monde y fust : et là dessus les rangea en ordonnance, et dressa ses batailles pour marcher contre nos gens ; lesquels, d’abord qu’ils les apperçeurent, coururent aux armes de toutes parts. Or ce jour là Henry, frere du comte Baudoüin de Flandres, estoit de garde avec Mathieu de Valincourt et Beaudoüin de Beauvoir, et leurs trouppes. A l’endroit où ils estoient campez, l’empereur Alexis avoit ordonné force gens pour sortir par trois portes, et les attaquer pendant que d’un autre costé il donneroit de tout son effort, et viendroit fondre sur eux. Cependant les six batailles qui avoient esté ordonnées, ainsi qu’il a esté dit cy-devant, se rangérent au devant de leurs palissades, ayans leurs sergeans et leurs escuyers à pied joignant la crouppe de leurs chevaux, et devant eux les archers et les arbalestriers. Ils dressérent encore un autre petit bataillon de bien deux cens de leurs chevaliers qui avoient perdu leurs chevaux ; et ainsi les attendirent de pied ferme devant leurs lices sans avançer : ce qui fut sagement avisé, car, s’ils se fussent abandonnez à la plaine pour charger les autres, ils estoient en si grand nombre que de leur foulle il les eussent accablez.
93. De fait, il sembloit que toute la campagne fût couverte d’escadrons, et venoient le petit pas en bonne ordonnance ; de maniere qu’il sembloit estre chose bien périlleuse que six batailles, et encore foibles, en voulussent attendre plus de soixante, dont
