de Saint Paul, Pierre d’Amiens son neveu, Eustache de Canteleu, Anseau de Cahieu, et plusieurs bons chevaliers de leurs terres et pays.
78. Que Louys, comte de Blois, qui estoit un riche, puissant et redouté seigneur, et qui avoit à sa suitte grand nombre de bons chevaliers et de braves gens, feroit la quatriéme.
79. La cinquiéme bataille seroit de Mathieu de Montmorency et du champenois Eudes de Champlite : Geoffroy, mareschal de Champagne, fut en celle-là avec Oger de Saint-Cheron, Manassés de Lisle, Miles de Brabans, Machaire de Sainte-Menehoult, Jean Foisnons, Guy de Chappes, Clerembaut son neveu, et Robert de Ronçoy. Tous ceux-cy firent la cinquiéme bataille, en laquelle il y eut nombre de bons chevaliers.
80. La sixiéme fut du marquis Boniface de Montferrat, qui fut bien fournie et nombreuse, parce que les Lombards, les Toscans, les Alemans, et generalement tous ceux qui estoient du pays enclavé depuis le Mont-Cenis jusqu’à Lyon sur le Rhosne, s’y rangérent ; et fut convenu que le marquis feroit l’arriere-garde.
81. Le jour fut aussi arresté auquel ils se devroient retirer dans leurs vaisseaux pour ensuitte prendre terre, resolus de vaincre ou de mourir.
82. Et veritablement ce fut là la plus perilleuse entreprise qui se fit jamais. Alors les evesques et les ecclesiastiques qui estoient pour lors en l’armée, firent leurs remontrances à tous ceux du camp, les exhortans à se confesser et à faire leurs testamens dautant qu’ils ne sçavoient l’heure qu’il plairoit à
