Quant l’entendi Aiol[s], a poi n’esrage d’ire,
Car il voit Mirabel coureçouse et irie.
Par ire saut en piés li fil[s] al duc Elie :
Ja parlera li ber par savoir sans folie.
Aiols li fiex Elie s’est contremont drechiés,
Sor une haute table monta a ses .ii. piés,
Si hautement parla que on l’entendi bien :
« Or m’escoutés, » fait il, « nobile chevalier,
« François et Borgengon, Alemant et Baivier,
« Qui les marces tenés, des chités estes cief !
« Aidiés moi mon signor Loeys a proier,
« Car je sui ses hons liges, si tieng de lui mon fié.
« Je li ai fait bataille et fort estor plenier,
« Et gueres afinees et furni ses loiers,
« Onques n’en demandai vallissant .ii. deniers,
« Ne mais que mes chevals me rendi volentiers.
« Chou que dira li siecles, mes iretages [i]ert :
« Orendroit le me renge, et je l’en voil proier. »
Et respondi li rois : « Tout vos soit otroié :
« Dites que vous plaist tost, tout vos ert otroié.
— Par mon cief, » dist Aiol[s], « ains m’en molt bien gagié,
« Et sor les sains juré et molt bien fianchié. »
Li rois a pris .i. gant que uns evesques ti[e]nt,
Si en saisit Aiol de quanque il li quiert.
Sor sains li a juré a .xxx. chevaliers
Del barnage de Franche de tous les plus prosiés,
Que il li rend[e]ra tout chou que ses drois iert.
Or parlera Aiol[s], li gentiex et li fiers.
Encore ne set mie li rois que c’ert ses niés,
Mais il de maintenant s’i vaura acointier.
« Amis, » che dist li rois, « or vos ai fait gent don,
« Savoir voil que volés et oir vo raison.
— Jel dirai, » dist Aiols, « si que François l’oront.
