Page:Montaigne - Essais, Didot, 1907, tome 1.djvu/482

sa vie, continuellement vn corps de cuirasse, sous vn habit de religieux, par pénitence. Foulques Comte d’Anjou alla iusques en Ierusalem, pour là se faire foëter à deux de ses valets, la corde au col, deuant le sepulchre de nostre Seigneur. Mais ne voit-on encore tous les iours au Vendredy S. en diuers lieux vn grand nombre d’hommes et femmes se battre iusques à se déchirer la chair et percer iusques aux os ? Cela ay-ie veu souuent et sans enchantement. Et disoit-on, car ils vont masquez, qu’il y en auoit, qui pour de l’argent entreprenoient en cela de garantir la religion d’autruy ; par vn mespris de la douleur, d’autant plus grand, que plus peuuent les éguillons de la deuotion, que de l’auarice.Q. Maximus enterra son fils Consulaire : M. Cato le sien Preteur designé : et L. Paulus les siens deux en peu de iours, d’vn visage rassis, et ne portant nul tesmoignage de deuil. Ie disois en mes iours, de quelqu’vn en gossant, qu’il auoit choué la diuine iustice. Car la mort violente de trois grands enfants, luy ayant esté enuoyée en vn iour, pour vn aspre coup de verge, comme il est à croire : peu s’en fallut qu’il ne la print à faueur et gratification singulière du ciel. Ie n’ensuis pas ces humeurs monstrueuses : mais i’en ay perdu en nourrice, deux ou trois, sinon sans regret, au moins sans fascherie. Si n’est-il guère accident, qui touche plus au vif les hommes. Ie voy assez d’autres communes occasions d’affliction, qu’à peine sentiroy-ie, si elles me venoyent. Et en ay mesprisé quand elles me sont venues, de celles ausquelles le monde donne vue si atroce figure, que ie n’oserois m’en vanter au peuple sans rougir. Ex quo intelligitur, non in natura, sed in opinione esse ægritudinem.L’opinion est vue puissante partie, hardie, et sans mesure. Qui rechercha iamais de telle faim la seurté et le repos, qu’Alexandre et Cæsar ont faict l’inquiétude et les difficultez ? Terez le père de Sitalcez souloit dire que quand il ne faisoit point la guerre, il luy estoit aduis qu’il n’y auoit point différence entre luy et son pallefrenier. Caton Consul, pour s’asseurer d’aucunes villes en Espaigne, ayant seulement interdict aux habitants d’icelles, de porter les armes : grand nombre se tuèrent : Ferox gens, nullam vitam rati sine armis esse. Combien en sçauons nous qui ont fuy la douceur d’vne vie tranquille, en leurs maisons parmy leurs cognoissans, pour suiure l’horreur des desers inhabitables ; et qui se sont iettez à l’abiection, vilité, et mespris du monde, et s’y sont pleuz iusques à l’affectation ? Le Cardinal Borrome, qui mourut dernièrement à Milan, au milieu de la desbauche, à quoy le conuioyt et sa noblesse, et ses grandes richesses, et l’air de l’Italie, et sa ieunesse, se maintint en