Page:Meyer - Girart de Roussillon, 1884.djvu/236

Le texte de cette page a été corrigé et est conforme au fac-similé.
ccxviii
appendice

luy chailloit a quoy faire il gaignast sa vie, mais que ce fust par honneur. Si trouva deux charbonniers qui se chauffoient a ung grant feu, dont l’un estoit appellé Richier et l’autre Hubert[1], et estoient natifz de celle contrée.

Celluy Hubert, quy plus estoit mocqueur et gabeur que Richier, demanda au fortuné prince Gerard se luy et la dame estoient pellerins, et de quel paijs ilz venoient. A quoy Gerard respondy que voirement ilz estoient pellerins et que leur argent estoit failly ; si en gaigneroient voulentiers pour avoir la vie de luy et de sa femme. [§ 533] Pour abregier, ilz menerent le noble prince (fol. iiijc lxxij) et la duchesse en la ville dont ilz estoient, nommée Aurical, assez près de Buillon en Ardenne, et accompaignerent Gerard pour porter charbon en la bonne ville et gaignier a butin. Car Gerard estoit plus grant et plus fort que nul d’eulx, et autant en eust porté tout seul que ilz eussent fait eulx deux. Et finablement ilz firent a Gerard louer une chambre en Aurical chiès une vaillant femme avecques laquelle Berthe la noble dame besongnoit en linge, en lange, en soye, voire de l’esguille tant bien que son labeur et ouvrage fut moustré, si qu’en peu de temps elle eust en ses mains toutes les bonnes besongnes des gentilz hommes, des seigneurs, d’eglise, de bourgois, des marchans, des dames, des damoiselles et bourgoises de la contrée. Et tant estoit belle, doulce, gracieuse et courtoise que toutes gens la regardoient moult voulentiers, et souvent frequentoient les filz de bourgois et jennes gentilz hommes entour elle pour son amour cuidier emprunter, mais saigement leur sçavoit respondre et donner excusations solventes et vaillables quant l’en luy disoit que moult belle estoit pour ung grant seigneur ou pour ung filz de chevallier ou de noble homme, et qu’elle seroit requise de habandonner celluy paysant charbonnier son mary quy estoit noir, embrouillé, grant, hideux et trop mal fait, tellement qu’il n’estoit point digne d’avoir la compaignie d’une telle figure comme elle portoit, et que moult la plaingnoient a celle cause.

  1. Ce ne sont pas les noms que portent les deux charbonniers dans la chanson.