couchié ou lit malade chiés le bourgois ou il avoit ja esté plusieurs jours moult affoibly, par les grans mesaises de famine, de froit, de morfonture, de malheureté, de paine, de traveil et de merancolie, mist ses bras a l’air hors du lit, si les regarda par grant admiration, et les vist meisgres, povres et si descharnez que plus n’y avoit de substance fors le cuir, les nerfs et les os. Adont il encommença de soy seignier, et se prinst a repentir des maulx qu’en son temps il avoit fais, disant : « Beaulx sire Dieu, mon pere, mon createur et mon redempteur, tant estes envers moy courrouchié. Et comme chierement me sont orendroit vendus les maulx quy a ma cause ont en mon temps estez commis. Ha a ! Fourques, franc et noble chevallier, or vous ay je bien perdu, et si ne sçay comment ou se vous estes mort ou vif. Et vous Boos, Bernard, Fouchier et Seguin quy en tant d’estours et de mortelles batailles (fol. iiijc lxxj) vous estes trouvez pour mon honneur soustenir et a voz povoirs garder ! Comme pour vostre amour fut mon cœur dolant quant sur la champaigne je vous percheuz devant moy mors gesir tous estendus a la terre !..... »
Adont la noble duchesse, oyant son seigneur ainsi souspirer haulça le chief pour le regarder et lui dist : « Mon chier seigneur quy vous meult de ainsi plourer et souspirer ?.... » (vo) Et pour le ung petit consoler luy recorda la vie d’un saint preudhomme lequel, pour pacientement avoir enduré les tribulations de ce monde, fut en la fin saulvé. Et tant de bonnes vertus et de bonnes euvres luy remonstra et par tant de fois que il en amenda sa vie et devint plus humble et plus recongnoissant que par avant n’avoit esté, et se maintint en tel estat de mieulx en mieulx, voire en recongnoissant son createur autrement qu’il n’avoit accoustumé de faire ; de quoy la dame quy tant estoit de toutes vertus garnie fut moult joieuse, et non sans cause. [§ 531] Et quant le vaillant prince fut guery, il prinst congié au bourgois et se mist au chemin vers les grans bois d’Ardenne en approchant la ville de Buillon[1] ; et advint que comme il traversait le chemin il ouy es bois des charpentiers ou au moins gens quy abatoient arbres, lesquelz il escouta et tira celle part pour les trouver, car il ne
- ↑ Il n’est pas question de Bouillon dans la chanson.
