fois il se fust desesperé ou en une maniere ou en autre, se la bonne duchesse ne l’en eust detourné en le trés aigrement reprenant, et en luy remoustrant comment il convenoit avoir pacience, et que tout ce luy procedoit par son oultrage, et que c’estoit pugnition de Dieu.
Pour abregier nostre narration le prince Gerard et la princhesse sa compaigne se destournerent de icelluy chemin et tant cheminerent qu’ilz approcherent une cité ou ville que l’on appelloit Roos[1], et la entrerent et se logerent en la maison d’une trés perverse femme laquelle leur refusa son logeis pour l’amour de Dieu. Et pour ce qu’il estoit feste si solempnele comme du jour de Noel, la duchesse requist a celle femme qu’en l’onneur de Dieu et de sa benoite nativité et du bon jour, qu’elle les voulsist herbergier. Adont le mari, oiant ce que dit est, vint a eulx et les loga soulz une montée ou le vent venoit de toutes pars et y faisoit une telle froidure que la prinst Gerart une telle maladie que tout le corps luy empira et deffist en quatre jours et quatre nuits que la se tindrent. [§ 527] Et comme il est dessus declairé, le noble duc avoit eue sa robe toute deschirée et rompue par les bois et par les espines, par les arroinches et autrement, si que la dame, quy tant estoit bonne ouvriere que nulle plus, la refaisoit de telle heure (vo) que la bourgoise chiés quy ilz estoient logiés vint illec et regarda la noble dame besongnier. Si fut comme fole et eschervelée et bouta hors de sa maison la dame et son mary, disant qu’elle n’avoit cure de telle truandaille qui estoient grans et fors et qui bien sçavoient gaignier leur vie se a eulx ne tenoit. Or estoit Gerard tellement agravé de maladie qu’il ne se povoit bonnement soustenir. [§§ 528-9] Si s’en perceu trés bien ung notable bourgois de Roos lequel se faisoit Henry appeller, lequel passoit par illec et luy dist qu’il s’en venist en son hostel et que pour l’honneur de Dieu trés voulentiers feroit penser de luy, comme il fist veritablement. Et tant bien en fist penser qu’en petit de temps il prinst a guerir. [§ 530] Ung jour entre les autres estant le noble duc Gerard
- ↑ Il y a dans la chanson (§ 526) Porz cairaz, ou dauraz, ou encore miraz, selon les mss.
