rage, et luy dist par bonne maniere : [519] « Beaux amis je t’ay bien entendu, et trop es en perilleux dangier si tu ne reprens ton bon sens, car le deable quy en ton corps est te fait parler et penser tout ce quy est contraire au salut de ton âme quant tu dis que tu te vengeras de celluy quy est trop plus puissant que tu n’es, et quy par sa force t’a desherité et tollu ton paijs et tes seignouries. Sur quoy je te respons qu’il a bien fait, et mal t’en prendra si tu ne viens a amendement. » Si fut le duc (vo) trop plus courrouchié que devant. Et bien dist que plus tost yroit oultre mer Dieu renoier que voirement ne s’en vengast, pour tant que a tort luy avoit fait guerre et qu’il luy avoit redemandé ce que autreffois luy avoit donné et quittié franchement par le traittié de son mariage. Adont lui respondy le saint hermite moult courtoisement disant : « Certes, chevallier, tu m’as icy racompté des choses bien terribles et merveilleuses, a quoy je te vueil faire une response. Presuposé tout ce que tu m’as dit, et que tu ne tiens point Charles Martel a seigneur, pour ytant que ja pieça il te quittast ta terre et te eust affranchy en ton mariage faisant, saches que il ne povoit ce bonnement faire se tous les douze pers de France ne l’avoient accordé et placquié leurs seaulx a la chartre sur ce donnée ; car ung roy de France ne peult luy ne ses hoirs, selon raison juste et vaillable, desheriter ; et si sont les pers et conseilliers de France ordonnez pour garder que l’honneur du royaulme ne soit par le roy meisme ne par autre diminué ; si vaulsist trop mieulx, quoy que tu penses en ton orgueilleux courage, que tu eusses le roy servy quant par ses messages il t’en envoya requerre, et pas ne feusses orendroit de tes seignouries fourbany. Et fais grant doubte que du pœuple dont tant est mort comme tu dis ne conviengne que tu en soies devant Dieu respondant. Si ne te sçauroie mieulx conseillier fors que tu t’en repentes de bon vouloir et que tu retournes par devers tes amis, lesquelz tu requerras que ilz prient au roy pour toy tellement que de sa (fol. iiijc lxiiij) benigne grace il te vueille pardonner tout ce que tu luy peulx avoir fourfait, et que il te rende tes terres et seignouries ; et tu le serviras comme tu es tenu de faire, toy bien conseillié, »
Trop merveilleusement fut courrouchié le vaillant duc Gerard
