Page:Marie de France - Poésies, éd. Roquefort, II, 1820.djvu/504

Le texte de cette page a été corrigé et est conforme au fac-similé.
492
POÉSIES

E délivres de lur péchez
Kar il en furent espurgez.
Près de cel liu ad un seint home
Que nus tenons à mult prodome
Hermites est, de bone vie ;
Chascune nuit, ço ne faut mie,
Ot les Diables assembler
Entur sun purpris, è parler.2100
A neire après soleil couchant
A véue tuz venent avant,
E si tenent lur parlement,
Einz le jor partent veirement ;
En dementiers k’il iluec sunt
Al meistre dient ço k’il funt.
Li Seinz les veit apertement
E ot lur contes mult sovent
A sa celle le vont tempter
Mès ne poent dedenz entrer.2110
En semblance de femmes nues
Se mustrèrent ; là sunt venues
Pur lui deceivre è engigner,
E feire sun porpos lesser ;
Par eus entendi de la gent
La vie de plusurs sovent.

Quant li Eveskes ne dist plus,
Uns suens Chapeleins leva sus