Vus véez bien ke sans dolur,
Sumes ici en grant dulçur.
En mult greignur joïe vendrons :
Mès quant ço ert ? Nus nel’ savons.
Nostre cumpaignie bien descreit
Chascun jor si cume ele creist,
Li espurgiez vienent ici,
E li autre si cum jo di,
Vunt de cest paradis terestre
Deci k’en paradis célestre.
Li Arceveske qui iluec sunt
Li menèrent en un haut munt
E lui dient k’il atornast
Ses oilz à-munt, si esguardast :
Se lur diseit de quel colur
Li ciel esteit en sa luur ?
Il lur respundi maintenant
Qu’il resemblout or flambéant ;
De si grant clarté fut espris
Que tuz ardeit ço lui est vis.
Ço est l’entré, biaus-amis,
De célestien Paradis ;
Quant aucun deit de nus torner,
Par cele porte deit entrer.
Sachez ke par iluek s’en vunt
Cil qui el ciel montent à-munt.
Page:Marie de France - Poésies, éd. Roquefort, II, 1820.djvu/492
Le texte de cette page a été corrigé et est conforme au fac-similé.
480
POÉSIES
