As chaitis qui furent dedenz ;
Tels as greignurs, tels as menors
Solum les ovres des plusors.
Cil qui plus pecchèrent el munt
Greignurs tormenz iluec aurunt ;
Tuit cil qui sunt en granz turmenz
Que vus véistes là dedenz,
A nus vendront, bien le sachiez,
Quant il èrent tuz espurgiez,
For cil qui el puz d’enfer sunt
Jamès de cel torment n’istrunt.
Chascun jur vienent ci à nus
Cil qui des peines sunt rescus,
A grant joïe les recevun
Od mult bèle processiun,
Puis sunt od nus dedenz cest clos
En grant joie è en grant repos.
Cil qui el mund sunt espurgiez
De lur péchiez è alégiez,
Trespasserunt légièrement,
L’Espurgatoire è le torment ;
Hastivement à nus vendrunt,
Al plaisir Deu i remaindrunt,
Nuls de ceus qui en peine sunt
Sevent cum bien il i serunt,
Ne cum bien il i unt esté,
C’est tut en la Deu volenté.
Page:Marie de France - Poésies, éd. Roquefort, II, 1820.djvu/490
Le texte de cette page a été corrigé et est conforme au fac-similé.
478
POÉSIES
