Le texte de cette page a été corrigé et est conforme au fac-similé.
423
DE MARIE DE FRANCE.
Lui donat è mist en sa mein,
E un bastun k’il dust porter
Quant il al pueple dut sermoner :
Uncor sunt el païs gardé
Pur reliques en grant cherté.
Pur ço ke le bastun dona
Deu à sun serf à comanda
Apele l’um icel bastun
Le bastun-Deu k’en fist le dun.
Itels choses deit cil aveir
Ki eveske est deit purseir
Ço nus mustre Malachias
En sa vie nel’ dutez pas.
Après cest fait Deus amena
Seinz-Patriz è si li mustra
En un désert un lius gastez,
Qui de gent n’ert pas habitez,
Une fosse tute runde
Si ert dedenz grant et parfunde ;
E sachez k’ele esteit obscure
Espuntable à démesure.
Puis lui dist k’iluek ert l’entrée
De Purgatoire et trovée,
E qui fust de ferme créance,
E éust en Deu espérance,
E fust confés de ses péchiez,
