Ke les almes qui sunt eslites,
A Deu è par lur bien parfites,
Vont el turment de Purgatorie,
Après cel mal irrunt en glorie.
Les unes sont en gref turment
Plus ke les autres veirement ;
Icist turment sunt esconsé,
A la gent ne sunt pas mustré,
Pur ço k’il sont espiritel,
E ke li home sunt mortel,
Ne purquant par révélaciuns
Véïent è par avisiuns
Plusurs des almes meinz granz signes
Solunc iço k’eles sunt dignes,
Quant eles sunt des cors ravies,
Par Deu revenent à lur vies ;
E dient bien par la mustrance
De cel espérite substance,
Ke semblable est à corporel,
Co k’il véïent espéritel.
E si nus dit ke hom mortel
Unt ço véu è corporel
Si cume en forme è en semblance
De Home corporel sustance.
Qui crerreit ço véréïment
Si n’en éust démustrement
Ceste chose estre vérité,
Page:Marie de France - Poésies, éd. Roquefort, II, 1820.djvu/430
Le texte de cette page a été corrigé et est conforme au fac-similé.
418
POÉSIES
