Mix vaureit estre mors que vis.
En une chanbre s’est sul mis,
A s’Amie crie merci,
Por Diu qu’il puist parler à li,
Ne li vaut rien, ni parlera,
Devant un an ne le verra,
Ne jà n’aura de li confort
Ains ert jugiés près de le mort.
Graelens maine grant dolur,
Il n’a repos ne nuit ne jur,
Qant s’Amie ne puet aveir.
Sa vie met en noncaleir,
Q’ançois que li ans fust passés,
Fu Graelens si aduilés ;
Que il n’a force ne vertu :
Ce dient cil qui l’unt véu
Merveille est qu’il a tant duré.
Al jur que li Rois ot numé,
Ke sa feste deveit tenir,
Li Reis a fait grant gent venir.
Li Plege amainent Graelent[1]
Devant le Rei en sun present.
Il li demande ù est s’Amie.
Sire, dist-il, nel’ amain mie,
Jeo ne la puis noient avoir,
Faites de moi vostre voloir.
- ↑ Voy. la note i sur le Lai de Lanval p. 233.
