Femme léal, espuse avez,
E sur cele autre emmenez
Cuntre Deu, è cuntre la lei,
Cuntre dreiture, è cuntre fei ;
Lessez-la nus geter en mer,
Si povum s’emprès ariver.
Eliduc oï que cil dist,
E à poi d’ire ne mesprist :
Fiz à putain, fet-il, mauveis,
Fel traïtre, nel’ dire meis,
Si m’Amie peust la laissier
Jeol’ vus eusse vendu mut cher.
Mès entre ses braz la teneit,
E cunfortout ceo qu’il poeit.
Del’ mal qu’ele ot en la mer
E de ceo qu’ele oï numer ;
Femme espusé ot sis Amis
Autre ke li en sun païs,
De sur son vis chéi paumée
Tute pale, desculurée,
En la paumeisun demurra,
Quel ne revint, ne suspira.
Cil ki ensemble od lui l’enporte,
Quidot por veir k’ele fust morte ;
Mut fet grant doel, sus est levez,
Vers l’esquier est tost alez,
Der avirun si l’ad feru
K’il l’abati tut estendu.
Page:Marie de France - Poésies, éd. Roquefort, I, 1820.djvu/476
Cette page a été validée par deux contributeurs.
460
LAI D’ELIDUC.
