Deus ses Nevuz qu’il mut ama,
E un suen Chamberlenc mena ;
Cil ot de lur cunseil esté,
E le message aveit porté,
E ses Esquiers sulement,
Il n’ot cure de autre gent.
A ceus fist plévir, è jurer
De tut sun afaire celer.
En mer se mist, plus ni atent,
Utre furent hastivement ;
En la cuntrée est arivez
U il esteit plus désirez.
Eliduc fut mut veistez,
Luin del’ hafnes s’est herbergiez,
Ne voleit mie estre véuz,
Ne trovez, ne recunéuz.
Sun Chamberlenc appareilla,
E à s’Amie l’envéia ;
Si li manda que venuz fu,
E bien ad sun cumand tenu.
La nuit quant tut fut à vespré
S’en éissi de la cité :
Li Chamberlenc od li ira,
E il encuntre li sera ;
Cil aveit tuz changié ses dras,
A pié s’en vet trestut le pas.
A la cité ala tut dreit,
U la fille le Rei esteit ;
Page:Marie de France - Poésies, éd. Roquefort, I, 1820.djvu/470
Cette page a été validée par deux contributeurs.
454
LAI D’ELIDUC
