Des chambres ù la Dame jut,
Quant à la fenestre s’estut,
Poiet parler à sun Ami,
Del’ autre part, è il a li ;
E lurs aveirs entre-changier,
E par geter, è par lancier.
N’unt guères rien qui lur despleise
Mut estéïent amdui à eise,
Fors tant k’il ne poient venir
Del’ tut ensemble à lur pleisir.
Kar la Dame ert estreit gardée,
Quant Cil esteit en la cuntrée ;
Mès de tant avéïent recur,
U fut par nuit, u fut par jur,
Que ensemble poeient parler ;
Nul ne poët de ceo garder,
Qu’à la fenestre ne venissent.
E iloëc s’entrevéissent.
Lungement se sunt entre-amé,
Tant que ceo vint à un esté,
Que bois è prés sunt reverdi,
E li vergier ièrent fluri.
Cil oiselez par grant duçur,
Mainent lur joie ensum la flur ;
Ki amer ad à sun talent,
N’est merveille s’il i entent.
Del Chevaliers vus dirai veir,
Il i entent à sun poeir ;
Page:Marie de France - Poésies, éd. Roquefort, I, 1820.djvu/334
Cette page a été validée par deux contributeurs.
318
LAI DU LAUSTIC.
