Dist li que mult a grant merveille,
Que sa Dame si s’apareille ;
Demanda lui que ce devot,
Sa Vielle dist qu’el’ ne savot,
Car nus ne puet parler à li.
N’ele ne voit dru ne ami,
Fors tant que sole remaneit,
Plus volentiers qu’el ne soleit,
De ce s’estoit apercéue.
Dont l’a li Sires respondue :
Par foi, fet-il, ce croi-geo bien,
Or nus estuet fère une rien.
Au matin quant g’ière levez,
E vus aurez les us fermez,
Fêtes semblant dehors issir,
Si la lessiez sule gésir ;
En un secré leu vus estez,
E si voiez et esgardez,
Ce que puet estre et dunt ce vient,
Qui en si grant joïe la tient.
De ce cunseil sunt départi
Alas ! cum ièrent mal-bailli
De ce que hum les vet guetier,
Pur eulz traïr et engrégier.
Tiers jurs après ice cunter,
Fet li Sires semblant d’esrer :
A sa fame a dist è cunté,
Que li Rois l’a par brief mandé,
Page:Marie de France - Poésies, éd. Roquefort, I, 1820.djvu/306
Cette page a été validée par deux contributeurs.
290
LAI D’YWENEC.
